Fréttir


Háttvísidagar FIFA 2009

04-09-2009

FIFA stendur nú fyrir sérstökum háttvísidögum í 13. sinn, en þeir voru fyrst haldnir árið 1997.  Að þessu sinni urðu dagarnir 5. til 9. september fyrir valinu, en á því tímabili eru einmitt tveir landsleikjadagar.  Háttvísidagarnir eru haldnir hátíðlegur á ýmsan hátt víðs vegar um heiminn, allt frá grasrótarknattspyrnu og til A-landsleikja.

 

Minnt verður á háttvísidaga FIFA hér á Íslandi í tengslum við leiki A-landsliðs karla í byrjun september.  Leikið verður gegn Norðmönnum 5. september, sem er síðasti leikur íslenska liðsins í undankeppni HM 2010, og síðan verður leikinn vináttulandsleikur gegn Georgíu 9. september.  Báðir leikirnir fara fram á Laugardalsvelli.

Knattspyrnusamband Íslands hvetur alla - leikmenn, þjálfara, dómara, stuðningsmenn og alla aðra sem tengjast knattspyrnu með einum eða öðrum hætti – til að sýna háttvísi, jafnt á vellinum sem utan hans.  KSÍ minnir á að hver einasti maður má aldrei missa sjónar á því að besta leiðin til að leika knattspyrnu er að sýna háttvísi, heiðarleika og virðingu.

10 gullnar reglur FIFA um háttvísi

  1. Leikið heiðarlega.
  2. Leikið til sigurs, en takið tapi með reisn.
  3. Hlítið knattspyrnulögunum.
  4. Sýnið mótherjum, samherjum, dómurum, forráðamönnum og stuðningsmönnum virðingu.
  5. Hafið heildarhagsmuni knattspyrnunnar í huga.
  6. Heiðrið þau sem verja gott orðspor knattspyrnunnar.
  7. Hafnið spillingu, ólöglegum lyfjum, eiturlyfjum, kynþáttahatri, ofbeldi, veðmálastarfsemi og öðrum hættum sem kunna að steðja að íþróttinni okkar.
  8. Styðjið aðra í að standast þrýsting spillingar.
  9. Afneitið þeim sem reyna að lítillækka íþróttina okkar.
  10. Notið knattspyrnu til að bæta heiminn.

Samstarfsaðilar