Fréttir


Bjarni hættur hjá KA

11-08-2015
Bjarni Jóhannsson er búinn að stýra sínum síðasta leik með KA. KA tilkynnti í dag að búið væri að slíta samstarfi Bjarna og félagsins. Samningur Bjarna við félagið átti að renna út í lok tímabilsins og KA hafði ákveðið að endurnýja ekki þann samning.
 
Í kjölfarið var ákveðið að Bjarni myndi hætta strax störfum. Aðstoðarmaður hans, Srdjan Tufedgzic, oft kallaður Tufa, klárar tímabilið með liðinu.

„Þessi ákvörðun er tekin í mesta bróðerni og vináttu“ segir Eiríkur S. Jóhannsson, formaður stjórnar knd. KA, á
heimasíðu félagsins.

„Bjarni hefur unnið gott starf hjá félaginu og hjálpað okkur við að undirbyggja félagið til frekari átaka og sést góður árangur starfa hans fyrir KA í okkar góðu umgjörð í félaginu. Að sjálfsögðu er það okkur jafnt sem honum vonbrigði að við séum ekki á betri stað í deildinni en raun ber vitni en liðið sem hann hefur mótað er sterkt og enn eru stig í pottinum sem þarf að ná í hús.

Það hefur verið mjög gaman að vinna með Bjarna, sem er frábær þjálfari auk þess að vera mikill og dyggur KA maður. Ég vil þakka honum kærlega fyrir samstarfið og veit að KA fólk mun taka vel á móti Bjarna í KA heimilinu og á vellinum í framtíðinni. Um leið óska ég Tufa alls hins besta í því starfi sem hann er nú að taka sér fyrir hendur. Við þekkjum vel til starfa hans og munum styðja vel við hann og strákana í átökunum sem framundan eru“.

Miklar væntingar voru gerðar til KA-liðsins fyrir leiktíðina enda miklu tjaldað til. Hlutirnir hafa aftur á móti ekki gengið upp og KA er í fimmta sæti deildarinnar og ekki á leið upp.

„Mér hefur liðið mjög vel hjá KA þessi þrjú ár sem ég hef verið hér. Hér hafa allir lagst á eitt við að byggja upp liðið og þá einstaklinga sem í því eru. KA hefur sjaldan staðið eins vel hvað mannskap varðar, hvort heldur sem er í meistaraflokki félagsins eða yngri flokkum," segir Bjarni við
heimasíðu KA.

„Ég hef haft mikinn metnað fyrir hönd félagsins og því ekki sáttur hve erfiðlega okkur hefur gengið að ná því markmiði að koma liðinu í hóp bestu liða landsins. Ég taldi best fyrir félagið og strákana í liðinu, að gefa Tufa tækifæri á að taka við stjórninni á liðinu og kalla fram kraftinn sem í liðinu býr. Ég er ánægður með að stjórn deildarinnar var mér sammála enda Tufa er topp maður sem hefur staðið þétt með mér í starfi mínu hjá félaginu og hann á framtíðina tvímælalaust fyrir sér sem stjórnandi knattspyrnuliðs á hæsta gæðaflokki. Ég óska honum og KA góðs gengis í framtíðinni“.

 

Samstarfsaðilar